Missión í Føroyum
Staðbundna arbeiðið er ryggurin í okkara missiónsarbeiði
Vit vilja, at menniskju kring alt landið fáa høvi til at taka ímóti Jesusi sum sínum frelsara og harra.
Okkara arbeiði byrjar í staðbundnu missións- og meinigheitshúsunum kring landið, sum eru ryggurin í okkara arbeiði. Her koma fólk saman um bøn, boðan, læru, sang og felagsskap. Her finna vit stuðul, tá ið lívið gerst svárt, og onkran at samgleðast við — og tað er haðani, at missiónin røkkur víða út um alt landið.
Staðbundin arbeiðir
Kring landið eru missións- og meinigheitshús, ið eru sjálvstøðug og skipa seg sjálvi. Saman eru øll hesi samlaði í eini vekingarrørsla við navninum Kirkjuliga Heimamissiónin. Í fleiri av staðbundnu arbeiðunum verður regluliga skipað fyri møti, sunnudagsskúla, ungdómsmøti, bíbliutíma, bíbliubólkum v.m.
- Bethania – Missiónshúsið í Gøtu
- Bønhúsið á Hellunum
- Bønhúsið í Ørðavík
- Bønhúsið í Søldarfirði
- KFUM&K í Klaksvík
- KOMA – Kirkja og missiónshúsið á Argjum
- Meinigheitshúsið á Skála
- Meinigheitshúsið í Havn
- Meinigheitshúsið í Sandavági
- Meinigheitshúsið í Vági
- Missiónshúsið á Eiði
- Missiónshúsið á Glyvrum
- Missiónshúsið á Sandi
- Missiónshúsið á Selatrað
- Missiónshúsið á Strondum
- Missiónshúsið á Tvøroyri
- Missiónshúsið á Viðareiði
- Missiónshúsið í Æðuvík
- Missiónshúsið í Hovi
- Missiónshúsið í Hvalba
- Missiónshúsið í Hvalvík
- Missiónshúsið í Kollafirði
- Missiónshúsið í Leirvík
- Missiónshúsið í Miðvági
- Missiónshúsið í Nólsoy
- Missiónshúsið í Oyndarfirði
- Missiónshúsið í Porkeri
- Missiónshúsið í Rituvík
- Missiónshúsið í Skálavík
- Missiónshúsið í Skopun
- Missiónshúsið í Sørvági
- Missiónshúsið í Sumba
- Missiónshúsið í Vestmanna
- Tabor – missiónshúsið á Toftum
- Thabor – Missiónshúsið í Fuglafirði
Trýst á nálina tættast við, har tú býrt, fyri at finna leinkju til heimasíðu ella sosialar miðlar við meira upplýsingum um arbeiðið á staðnum.
SAMAN í bøn
Missiónsfólk úr øllum landinum koma 4 ferðir árliga saman í bøn um veking í okkara landi, fyri okkara grannalondum og fyri teimum ónáddu fólkasløgunum.
Bønarkvøld í 2027
- 15. februar 2027
- 10. mai 2027
- 23. august 2027
- 15. november 2027
Trúboðarar kring landið
Hvat gera trúboðararnir?
- Boðan og bíbliu undirvísing
- Samtalur og heimavitjan
- Bøn og andaligur stuðul
- Møtir og tiltøk til børn, ung, familjur og eldri
- Samband og samstarv ímillum staðbundnu meinigheitirnar
Okkara løntu trúboðarar eru virknir úti um landið. Teir vitja menniskju og meinigheitir, boða, undirvísa og stuðla bæði leiðarum og sjálvbodnum. Teir standa lið um lið við menniskju, tá talan er um andaliga styrkjan, eggjan og uppbyggjan. Harafturat hava nakrir av trúboðarum eina serskilda uppgávu innan ávísar arbeiðsgreinar.
Sjómanstrúboðarin hevur sína dagligu gongd millum sjófólk, bæði til sjós og á havnunum. Hann boðar evangeliið, og knýtir samband við menniskju, ið oftani brúka langa tíð burturi frá familju og heimi.
Miðlatrúboðarin arbeiðir við talgildari missión, og at menna miðlarnar hjá Heimamissiónini, ið bera evangeliið út um alt landið. Við greinum, podvarpum, sjónbondum og talgildu miðlunum røkka vit víða um, og styrkja trúðarlívið, gerandisdagin hjá tí einstaka, og tey kristnu virðini í samfelagnum.
Fá eitt prát við ein av okkara trúboðarum
Tørvar tær hjálp ella íblástur til at leggja lokala arbeiðið til rættis, ella ynskir tú eitt prát um trúarlív, andlig viðurskifti ella hevur tú spurningar um kristnu trúnna. So ert tú vælkomin at venda tær til ein av okkara trúboðarum.
Gleðiboðskapurin til øll ættarlið
Vit arbeiða á nógvum ymiskum økjum, men endamálið er tað sama: at vekja upp trúarlívið og menna felagsskap teirra trúgvandi. Arbeiðið fevnir um ymisk ættarlið og lívsstøður. Les meira um tær ymisku arbeiðsgreinarnar og síggj, hvussu tú kanst vera við.
Børn og familjur
Vit vilja at alt húskið skal hava møguleikan at trúgva á Jesus. Vit arbeiða tí fyri at stuðla og menna barna-, junior- og familjuarbeiðið kring landið og hjálpa til at byrja nýggj arbeiði, har einki er. Harafturat skipa vit fyri legum og felags tiltøkum fyri børn og familjur úr øllum landinum.
Ung
Vit vilja búgva ung út til at fylgja Jesusi og virka í tænastu fyri hann alt lívið. Vit arbeiða tí fyri at stuðla og menna ungdómsarbeiðið kring landið og hjálpa til at byrja nýggj, har einki er. Harafturat skipa vit fyri legum, leiðaramenning og felags tiltøkum fyri ung úr øllum landinum.
Sjófólk
Vit vilja bera sjófólkinum gleðiboðskapin um Jesus og stimbra tey í trúnni á hann – samstundis sum gott menniskjaligt arbeiði verður gjørt. Vit arbeiða tí fyri at hava samband við sjófólk og vitja umborð á føroyskum skipum, bæði heima og úti. Harafturat breiðir Sjómansmissiónin út kristiligt tilfar til skip og skipar fyri tiltøkum og átøkum, sum knýta sjófólk og familjur teirra at arbeiðinum.
Miðlar
Vit vilja bera gleðiboðskapin um Jesus út til menniskju gjøgnum miðlar. Vit arbeiða tí fyri at skapa og miðla kristiligt innihald, sum kann vekja trúgv, geva upplæring og styrkja trúarlívið. Við talgildum miðlum vilja vit eisini røkka menniskjum, sum vit ikki møta í tí vanliga missiónsarbeiðinum.
Forlag og bókasøla
Vit vilja geva menniskjum atgongd til góðar bøkur og annað tilfar, sum kann vekja trúgv og hjálpa teimum at vaksa í trúnni. Vit arbeiða tí við at geva út føroyskt kristiligt tilfar og gera kristiligar bøkur og annað tilfar lætt at fáa fatur á.
Sang & Tónleikur
Sangur bindur ættarlið saman. Hann lærir børn trúarinnar mál, hann ber vaksin gjøgnum bæði ljósar og myrkar dagar, og hann hjálpir eldri at minnast Guds trúfesti. Tónleikurin gevur orðunum veingir og ger at evangeliið er til staðar í heimum, í meinigheitum og í missiónshúsum kring alt landið.
Tí eru sangur og tónleikur ikki bara ein arbeiðsgrein í Heimamissiónini — tað er ein partur av okkara lívi og andadrátti. Tað er við hesum, at vit deila trúnna, styrkja felagsskapin og halda søguni á lívi.
Vit arbeiða tí fyri at menna og stuðla sang-, tónleika- og kórarbeiðið í staðbundnu arbeiðunum, og skipa fyri sangskeiðum, festivalum o.l., ið stimbra undir sang- og tónleikamenning í Heimamissiónini og boðan av Guds orði ígjøgnum sang.
Tiltøk
Stórmøti
Á hvørjum ári skipa vit fyri stórmøtum yvir eitt vikuskifti, har gleðiboðskapurin er í fokus. Fólk koma saman úr øllum landinum til góðan sang, kveikjandi undirvísing og felagsskap.
Okkara lega
Hetta er legan fyri fólk við rørslu- og menningartarni o.ø. saman við avvarðandi, og er hon fyri mong hæddarpunktið á árinum. Dagarnir, ið vanliga eru fyrst í september, eru merktir av góðum felagsskapi, gestablídni, sangi, andaktum og nógvum ymiskum tiltøkum.
60+
Dagurin fyri tey eldru við góðari undirvísing, áhugaverdum fyrilestrum og góðum mati – umframt at tíð er til góð prát í fríløtunum.
Mannfólkavikuskifti
Nógvir mans gleða seg á hvørjum ári til vikuskifti um hálvan september, tá mannfólkavikuskifti er í Nesvík. Hetta er høvið at hugna sær saman og fáa andaliga áfylling og íblástur til trúarlívið.
Kvinnuting
Í mong ár hava kvinnur úr øllum landinum samlast til nakrar dagar við góðum felagsskapi og kveikjandi undirvísing í Leguhúsinum í Nesvík.
Bíbliuskeið
Vilt tú skilja Bíbliuna betur? So er árliga bíbliuskeiðið í Nesvík nakað fyri teg. Her koma vit saman til undirvísing um ymisk evnir úr Guds orði, sum geva okkara trúarlívi dýpd og gleði.
Leiðararáðstevna og felagsfundir
Stýrislimir úr missións- og meinigheitshúsum kring landið koma hvørt ár saman til leiðararáðstevnu og felagsfund, har leiðslueggin verður brýnd, umframt at gongdin í missiónsarbeiðinum verður umrødd og borin fram fyri Harran í bøn.