Bloggur

Kløn og í góðari venjing, tá ið Jesus kemur aftur

Evni:

Raðfesting Motivatión Missión

Sambært Resons Analyse eru trý ting, sum ganga aftur í listanum av nýggjárslyftum hjá norðmonnum: venja meira, lætna og eta sunnari. Kanningin ger ikki mun ímillum kristin og onnur, men neyvan eru málini so øðrvísi fyri tey, ið ynskja at fylgja Jesusi.

Kristin úr øðrum heimspørtum nevna mangan, at vit her í Vesturheiminum eru mest upptikin av tí, sum hoyrir hesum lívi til. Vit hugsa tilsvarandi minni um ævinleikan og Guds ríki. Um vit skuldu nátt okkara málum, so eru vit fegin bæði sunnari, klænri og í betri venjing, tá ið Jesus kemur aftur. Harafturat eru vit kanska liðug við at fríðka um húsini, og vit hava keypt postalínið, ið vit so leingi hava droymt um. Tað eru fá onnur, sum duga betur enn vit at seta gerandislig og materiell mál.

Mótsetningurin er harvið stórur til, hvussu systrar og brøður í øðrum pørtum av heiminum hugsa. Í dag fekk eg eitt teldubræv frá einum presti í Liberia. – Henda mánaðin fara vit at fasta og biðja í 21 dagar. Hetta gera vit við hvørja ársbyrjan fyri at søkja Guds náði og miskunn, skrivar hann, áðrenn hann fortelur um eina nýggja kirkju, sum hann hevur verið við til at byrja 400 kilometrar frá høvuðsstaðnum Monrovia: – Hon veksur skjótt. Takk Gud fyri tað!

Kanska tú ert teirra millum, sum við ársbyrjan hevur týðilig mál og megnar at fremja tey. Ella kanska tú ert ein, sum veitst hvat tú vilt, men stríðist við at megna tað. Sama hvat bjóði eg tær av til at hugsa um ynskini og málini, tú hevur sett tær, enn einaferð og seta fylgjandi spurningar:

Hvussu nógv av tínum málum hava veruligan týdning at náa, áðrenn Jesus kemur aftur? Hvat hevði Jesus sagt um tíni mál?
Hvussu nógv av tínum málum snúgva seg um Gud og hansara ríki? Bíblian sigur, at vit skulu søkja Guds ríki fyrst. So vil hann geva okkum alt annað umframt (Matt 6,33).
Hvussu nógv av tínum málum snúgva seg um at bera gleðiboðskapin víðari? Jesus hevur biðið okkum bera gleðiboðini um Guds ríki og hansara frelsu til øll fólkasløg (Matt 28,18-20).

Við hesa ársbyrjan vita vit eitt fyri vist. Vit eru nú nærri Jesu afturkomu enn nakrantíð. Hann bað okkum gera øll fólkasløgini til sínar lærusveinar. Men vit hava langt eftir á mál enn. Tí er tað av týdningi, at tað at fara víðari við gleðiboðskapinum verður ein týðiligur og inngrógvin partur eisini av persónligu málunum, ið vit seta okkum fyri. “Sælur er tann tænari, sum húsbóndin finnur arbeiðandi, tá ið hann kemur aftur.” (Matt 24,46, leysliga).

Steinar Opheim, DagensDebatt.no

Umsett: Jákup Justinussen

Bloggurin er eitt persónligt sjónarmið hjá tí, sum hevur skrivað, og hevur til endamáls at lýsa, bjóða av ella skapa orðaskifti um viðurskifti, sum onkusvegna hava við missión, kirkju og kristnilív at gera. Bloggurin er tí ikki neyðturviliga sjónarmið hjá Heimamissiónini og leiðslu hennara.

2015

2014

2013

Leita eftir evni